Трампын засаг захиргааны шинэ удирдамжийн дагуу, эрүүл мэндийн асуудалтай цагаачдад виз олгохоос татгалзаж магадгүй байгаа бөгөөд чихрийн шижин, таргалалтыг татгалзах үндсэн оношуудын нэг болно гэж ABC News мэдээлэв.

11-р сарын 6-нд гаргасан шинэ удирдамжийн дагуу, АНУ-ын байнгын оршин суух виз авахаар өргөдөл гаргаж буй гадаадын иргэдэд, чихрийн шижин,таргалалт зэрэг тодорхой эрүүл мэндийн асуудалтай бол татгалзаж болно.

Төрийн департаментын визний ажилтнуудад, нас эсвэл засгийн газрын тэтгэмжээс хамааралтай болох магадлал зэрэг хэд хэдэн шинэ шалтгаанаар, өргөдөл гаргагчдыг АНУ-д оруулах боломжгүй гэж үзэхийг зааварчилжээ. Уг баримт бичигт, ийм хүмүүс эрүүл мэндийн асуудал эсвэл наснаас шалтгаалан "нийгэмд дарамт учируулж" болзошгүй гэж заасан байна. Ер нь, цагаачдын эрүүл мэндийг үнэлэх, ялангуяа сүрьеэ зэрэг халдварт өвчнийг илрүүлэх, вакцинжуулалтыг баталгаажуулах зэрэг нь, визний өргөдөл гаргах үйл явцын нэг хэсэг байсаар ирсэн ч, энэхүү шинэ удирдамж нь авч үзэх ёстой өвчний жагсаалтыг мэдэгдэхүйц өргөжүүлж, визний ажилтнуудад өргөдөл гаргагчийн эрүүл мэндэд үндэслэн цагаачлалын шийдвэр гаргах илүү их эрх мэдэл олгож байгааг мэргэжилтнүүд тэмдэглэж байна.

Энэхүү удирдамж нь, АНУ-д зөвшөөрөлгүйгээр амьдарч буй цагаачдыг албадан гаргах, цагаачлалын шинэ оролдлогыг хязгаарлах Трампын засаг захиргааны кампанит ажлын нэг хэсэг бөгөөд үүний зэрэгцээ Цагаан ордон, цагаачдыг олноор нь баривчилж, хэд хэдэн орноос дүрвэгсдийг оруулахыг хориглож, тус улсад хүлээн зөвшөөрөгдсөн хүмүүсийн нийт тоог хязгаарлаад байгаа юм.

Шинэ удирдамжид цагаачдын өргөдлийг хянаж үзэхдээ тэдний эрүүл мэндийг онцгойлон анхаарч үзэхийг уриалсан. Мөн энэхүү удирдамж нь өргөдөл гаргагчдын бараг бүх ангилалд хамаарах боловч, практик дээр үүнийг голчлон АНУ-д байнгын оршин суух зөвшөөрөл хүссэн хүмүүст ашиглах магадлалтай гэж, Ашгийн бус өмгөөллийн байгууллага болох Католик Цагаачлалын Хууль Зүйн Сүлжээ (CLINIC)-ний ахлах ажилтан, өмгөөлөгч Чарльз Уилер ярьжээ.

Энэхүү тогтоол визний ажилтнуудад, цагаач нь олон нийт, нийгэмд дарамт учруулж болзошгүй эсэхийг үнэлэхдээ, астма, нойрны апноэ, цусны даралт ихсэлт зэргийг өдөөдөг таргалалт, бусад нөхцөл байдлыг харгалзан үзэхийг зөвлөжээ. "Эдгээр өвчнүүд нь үнэтэй, урт хугацааны эмчилгээ шаарддаг" гэж баримт бичигт тайлбарласан байна.

Визний ажилтнуудад, өргөдөл гаргагчид нь АНУ-ын засгийн газрын дэмжлэггүйгээр эмнэлгийн тусламжийн төлбөрийг төлөх боломжтой, хангалттай санхүүгийн эх үүсвэртэй эсэхийг тодорхойлох зааварчилга өгчээ. Цагаачид АНУ-ын Элчин сайдын яамнаас гаргасан эмчийн үзлэгт аль хэдийнээс хамрагдаж эхэлжээ. Тэднийг сүрьеэ зэрэг халдварт өвчний шинжилгээнд хамруулж, мансууруулах бодис, согтууруулах ундааны хэрэглээ, сэтгэцийн эрүүл мэндийн асуудал, хүчирхийллийн талаарх асуулга бөглөх, мөн улаанбурхан, полиомиелит, гепатит В зэрэг халдварт өвчний эсрэг хэд хэдэн вакцин хийлгэх шаардлагатай болсон.

Жоржтауны их сургуулийн цагаачлалын өмгөөлөгч Женовез, “Хэрэв эдгээр өөрчлөлтүүд нэн даруй хэрэгжиж эхэлбэл, энэ нь консулын газруудад ярилцлага өгөх үед олон асуудал үүсгэх нь гарцаагүй." гэж бичжээ.