Цагаан ордны мэдээлснээр, хүүхэд асрах хөтөлбөрүүдэд илэрсэн залилан мэхлэлтийн сэжигтэй хэргүүдтэй холбоотойгоор бүх 50 мужид аудит, нэмэлт баталгаажуулалт хийх шаардлагатай болсон байна.

Энэхүү арга хэмжээний гол шалтгаан нь Миннесота мужид, ялангуяа Сомали гаралтай оршин суугчдын ажиллуулдаг зарим хүүхэд асрах төвүүдтэй холбоотой залилангийн схемүүд илэрсэнтэй холбоотой гэж Ассошиэйтед Пресс мэдээлжээ. Үүний улмаас муж улсууд Хүүхэд асрах, хөгжлийн сангаас (CCDF) санхүүжилт авахын өмнө ирц, лиценз, шалгалтын тайлан, өмнөх зөрчлийн мэдээлэл зэрэг нэмэлт баримт бичиг бүрдүүлэх шаардлагатай болж байна.

Гэсэн ч Ардчилсан намын удирдлагууд уг шийдвэрийг улс төрийн зорилготой гэж шүүмжилж байна. Миннесота мужийн Ерөнхий прокурор Кейт Эллисон хүүхэд асрах чухал үйлчилгээг гэнэт тасалдуулахгүй байхын тулд хууль эрх зүйн бүх боломжийг судалж байгаагаа мэдэгдэв. Мөн Миннесота мужийн захирагч, Ардчилсан намаас дэд ерөнхийлөгчид нэр дэвшигч Тим Уолз энэ үйл явдлыг Трампын засаг захиргааны “улс төрийн урт хугацааны тоглоом” хэмээн тодорхойлжээ.

Харин Цагаан ордон уг шийдвэрийг “улс орон даяар тархсан байж болзошгүй ноцтой луйвар”-т өгч буй хариу арга хэмжээ гэж тайлбарласан байна. Засаг захиргаа Миннесотагаас гадна Калифорни, Нью-Йорк зэрэг Ардчилсан намын хяналттай бусад мужуудад ч залилангийн хэргийг шалгаж эхэлжээ.

Санхүүжилт царцсантай холбоотойгоор хүүхэд асрах төвүүд болон олон мянган гэр бүлд хүндрэл үүсэх эрсдэлтэй байна. Холбооны санхүүжилтгүй бол зарим төвүүд багш нараа цомхотгож, анги танхимаа хаахад хүрч болзошгүйг салбарын төлөөлөгчид анхааруулж байна. Үүний зэрэгцээ Сомалийн нийгэмлэгийн гишүүд дарамт шахалт, заналхийлэл нэмэгдэх вий гэсэн болгоомжлол илэрхийлж байна.