АНУ-ын Хүнс, эмийн захиргаа (FDA) ойрын хараа мууддаг насжилттай холбоотой эмгэг — пресбиопийг эмчлэх Yuvezzi нэртэй жороор олгодог шинэ нүдний дусаалгыг баталлаа. Уг эмийг Tenpoint Therapeutics боловсруулсан бөгөөд өдөрт нэг удаа дусааж хэрэглэдэг.

Yuvezzi нь, карбакол болон бримонидин тартрат гэсэн хоёр идэвхтэй бодисын хослол юм.

Карбакол нь, хүүхэн харааг нарийсгаж, фокусын гүнийг нэмэгдүүлснээр жижиг үсгийг тод харахад тусалдаг.

Бримонидин нь, хүүхэн хараа хэт тэлэхээс сэргийлж, улайлт болон цочролын эрсдлийг бууруулдаг.

Дусааснаас хойш ойролцоогоор 30 минутын дараа үйлчилж эхэлж, ихэнх хүмүүст 8–10 цагийн турш ойрын харааг нь сайжруулдаг. Ингэснээр хэрэглэгчид гар утас, ном, цэс зэрэг жижиг бичвэрийг уншихдаа шил хэрэглэхгүй байх боломжтой.

FDA-ийн шийдвэр нь 800 гаруй хүнийг хамруулсан III үе шатны BRIO I, BRIO II судалгаанд үндэслэжээ. Судалгаагаар:

Оролцогчдын нэлээд хэсгийн ойрын хараа стандарт хүснэгтээр дор хаяж 3 мөрөөр сайжирсан

Алсын хараанд нөлөөлөх сөрөг нөлөө бага байсан

Ноцтой гаж нөлөө бүртгэгдээгүй

Хамгийн түгээмэл зовиур нь, түр зуур хорсох, бага зэргийн бүдэг хараа, толгой өвдөх байв. Нүдний улайлт 3% орчимд ажиглагдсан нь дан карбакол хэрэглэсэн бүлгээс бага үзүүлэлттэй байжээ.

Yuvezzi нь өмнө батлагдсан AbbVie-ийн Vuity болон LENZ Therapeutics-ийн Vizz эмүүдтэй ижил зарчмаар (хүүхэн хараа нарийсгах) үйлчилдэг. Гэхдээ хоёр бодисын тогтмол хослол, хадгалалтын бодисгүй найрлага, өдөрт нэг удаагийн энгийн хэрэглээгээрээ давуу талтай гэж үзэж байна.

Хэнд илүү тохиромжтой вэ?

Мэргэжилтнүүдийн үзэж байгаагаар:

40–50 насны

Алсын хараа хэвийн

Эрт болон дунд зэргийн пресбиопитой хүмүүст хамгийн үр дүнтэй.

Харин хүнд хэлбэрийн пресбиопи эсвэл бусад нүдний өвчтэй хүмүүст шил, контакт линз шаардлагатай хэвээр байна.

Зах зээлд гарах хугацаа, үнэ

Yuvezzi-г 2026 оны хоёрдугаар улиралд АНУ-д худалдаанд гаргахаар төлөвлөж байна. Албан ёсны үнэ хараахан зарлагдаагүй ч, ижил төрлийн дусаалгууд сард ойролцоогоор 70–100 ам.долларын үнэтэй байдаг.

Дүгнэлт: Yuvezzi нь унших шилийг бүрэн орлох шийдэл биш ч пресбиопитой сая сая хүнд өдөр тутмын амьдралд илүү хялбар, мэс заслын бус шинэ сонголт нэмж өгч байгаа юм.