Hertz компани, цагаачдыг Uber-д ажиллахад зориулан машин түрээсэлж байна

АНУ-д цагаачлан ирсэн хүмүүсийн ихэнх нь эхэндээ ажил олоход хэцүү байдаг бөгөөд эхний үед Uber-ээр мөнгө олох боломжтой ч, машин хэрэгтэй болдог. Харин машин авах мөнгөгүй хүмүүст болон ажилгүй, зээлийн түүхгүй АНУ-д шинээр ирсэн хүмүүст банкууд зээл өгдөггүй зэрэг асуудлыг шийдэхийн тулд Uber болон автомашин түрээслэгч Hertz компани хамтран ажиллахаар болжээ. Одоо та Hertz-ээс түрээсэлсэн машинаар Uber-д ажиллах боломжтой боллоо.

Hertz-ээс машин түрээслэж, Uber-д ажиллахын тулд эхлээд Uber програм эсвэл вэбсайт дээр бүртгэл үүсгэж, бүртгүүлэхдээ машин авах хүсэлтэй байгаагаа илэрхийлэх хэрэгтэй. Дараа нь та Hertz-ийн вэбсайтаас түрээсийн машин сонгож, өөрт ойр байрлах Hertz оффис дээр уулзах цаг товлоно.

Машиныг Uber-д ажиллахаар ашиглах гэж байгаа бол дор хаяж 7 хоног түрээслэх хүсэлт гаргах ёстой. Дараа нь сонгосон огноо, цагтаа Hertz-ийн цэг дээр очиж, зээлийн болон дебит карт ашиглан түрээсээ төлөх боломжтой. Энэ хөтөлбөрийн түрээсийн үнэ долоо хоногт 214 доллараас эхэлдэг.

Машин захиалах хамгийн бага хугацаа нь 7 хоног байна. Та түрээсээ 7 хоног тутамд автоматаар шинэчлэх боломжтой, гэхдээ ердөө гуравхан удаа. 28 хоног тутамд машиныг таны түрээсэлсэн Hertz-ийн түрээсийн байршилд буцааж үнэлгээ хийлгэж, 28 хоногийн шинэ гэрээ байгуулах ёстой.

Hertz нь 11 мужид оффисуудтай бөгөөд Uber-д машин түрээслэх үйлчилгээ үзүүлдэг. /https://www.hertz.com/rentacar/misc/index.jsp?targetPage=uber_landing_page.jsp&LinkType=HZLK/

Uber-д Hertz-ээс машин түрээслэх зардал:

Hertz-ийн долоо хоногийн түрээсийн үнэ долоо хоногт 214 доллар байна. Үүнд татвар, хураамж, бензин болон бусад нэмэлт зардал ороогүй болно. Таныг машинаа авах үед 200 долларын барьцаа авна.

Hertz-ийн шаардлага:

Hertz-ээс машин түрээслэхийн тулд та дараах шаардлагыг хангасан байх ёстой.

• Hertz-тэй ажилласан сайн нэр хүндтэй (хэрэв та өмнө нь компаниас машин түрээсэлж байсан бол).
• 21-с дээш настай байх.
• Хүчинтэй жолооны үнэмлэх.
• Хүчинтэй кредит эсвэл дебит карт.
• Долоо хоног бүр машин түрээслэх, кредит эсвэл дебит картаар 200 долларын барьцаа төлөхөд шаардагдах мөнгөн дүнгийн бэлэн байдал.

Uber-ийн шаардлага:

• Тухайн бүс нутагт машин жолоодох хууль ёсны насанд хүрсэн байх;
• Жолооны үнэмлэх;
• Дор хаяж нэг жил жолоо барьсан туршлагатай байх;
• Тохиромжтой, 4 хаалгатай машин.