Дэнзел Вашингтон зэрэг 17 хүнд Эрх чөлөөний одонг Ерөнхийлөгч Байден гардуулах болжээ.

Ерөнхийлөгч Жо Байден энгийн иргэнд олгодог үндэсний дээд өргөмжлөл болох Ерөнхийлөгчийн эрх чөлөөний одонг түүнтэй АНУ-ын Сенатад хамт ажиллаж байсан Аризонагийн Бүгд найрамдах намын гишүүн, талийгаач Жон Маккейн, жүжигчин Дензел Вашингтон, гимнастикч Симоне Бэйлес, зэрэг 17 хүнд гардуулна гэж Цагаан ордон баасан гарагт зарлав.

Дэнзел Вашингтон бол хоёр удаагийн Оскарын шагналт жүжигчин, найруулагч, продюсер юм. Мөн тэрээр Tony шагнал, хоёр Алтан бөмбөрцөг, Сесил Б.ДеМиллийн насан туршийн амжилтын шагналтай. Тэрээр Америкийн Boys & Girls Clubs-т удаан хугацааны турш хэвлэлийн төлөөлөгчөөр ажилласан.
Байдены нэрэмжит шагналын жагсаалтад Холливудын ертөнц, спорт, улс төр, цэрэг арми, академи, иргэний эрх, нийгмийн шударга ёсыг сурталчлах чиглэлээр ажиллаж байсан амьд болон нас барсан гавьяатнууд багтсан байна. Ерөнхийлөгч Жо Байден энэ сарын 7-нд Цагаан ордонд одонг эздэд нь гардуулах юм.

Бусад Эрх чөлөөний одонгийн шагналтнууд:

Симоне Бэйлес:
Бэйлес бол Олимп болон Дэлхийн аваргаас 32 медаль хүртсэн АНУ-ын түүхэн дэх хамгийн олон медаль хүртсэн гимнастикч юм. Тэрээр тамирчдын сэтгэцийн эрүүл мэнд, асрамжийн газарт байгаа хүүхдүүд, бэлгийн хүчирхийлэлд өртсөн хохирогчид зэрэг асуудлуудад идэвхтэй, өөрийн дуу хоолойгоо оруулан тэмцэгч юм.

Сандра Линдсей:
Нью-Йорк хотын сувилагч бөгөөд 2020 оны 12-р сард, шууд телевизээр АНУ-д COVID-19 вакцины анхны тунг гартаа хийлгэхээр ханцуй шамлан орсон нэгэн юм. Тэрээр COVID-19-ийн вакцинжуулалтыг олон нийтэд дэмжигч болсон.

Жон Маккейн:
2018 онд тархины хорт хавдраар нас барсан Маккейн, АНУ-ын Тэнгисийн цэргийн хүчинд алба хааж байхдаа Вьетнамд таван жил гаруй олзлогдож байсан. Дараа нь тэрээр Конгрессын хоёр танхимд Аризона мужийг төлөөлөн ажиллаж байсан бөгөөд 2008 онд Бүгд найрамдах намаас ерөнхийлөгчийн сонгуульд нэр дэвшиж байсан юм. Байден, Маккейныг "хүндэт найз" мөн "баатар" байсан гэж хэлжээ.

Гэлэнмаа Симоне Кэмпбелл:
Кэмпбелл бол Нийгмийн үйлчилгээний гишүүн бөгөөд Католик шашны нийгмийн шударга ёсны байгууллага болох NETWORK-ийн гүйцэтгэх захирал асан. Тэрээр АНУ-ын цагаачлалын систем, эрүүл мэндийн бодлогыг шинэчилж, эдийн засгийн шударга ёсны төлөө тэмцэгч юм.

Жулиета Гарсиа:
Браунсвилл дахь Техасын их сургуулийн ерөнхийлөгч асан Гарсиа нь коллежийн ерөнхийлөгч болсон анхны Латин гаралтай хүн болсон юм гэж Цагаан ордон мэдэгдэв. Түүнийг Time сэтгүүл улсын шилдэг коллежийн ерөнхийлөгчийн нэгээр нэрлэжээ.

Габриэль Гиффордс:
Аризона мужаас АНУ-ын Төлөөлөгчдийн танхимын гишүүн асан, Ардчилсан намын гишүүн тэрээр галт зэвсэг, бууны хүчирхийллийг таслан зогсоох зорилготой Гиффордс байгууллагыг үүсгэн байгуулжээ. Тэрээр 2011 оны нэгдүгээр сард Туксон хотод болсон зохион байгуулалтын арга хэмжээний үеэр толгойдоо буудуулж, хүнд шархадсан юм.

Фред Грей:
Грэй бол сэргээн босголтын дараа Алабама мужийн хууль тогтоох байгууллагын анхны хар арьст гишүүдийн нэг юм. Тэрээр Роза Паркс, NAACP, Мартин Лютер Кинг Жуниорыг төлөөлж байсан иргэний эрхийн нэрт хуульч байсан.

Стив Жобс:
Жобс, Apple Inc-ийн үүсгэн байгуулагч, гүйцэтгэх захирал, даргаар ажиллаж байсан бөгөөд 2011 онд нас барсан.

Эцэг Александр Карлуотсос:
Карлуотсос бол Америкийн хамба лам Деметриосын туслах юм. Цагаан ордон Карлуотсос АНУ-ын хэд хэдэн ерөнхийлөгчид зөвлөгөө өгж байсан гэж мэдэгдэв.

Кизр Кхан:
Пакистанаас ирсэн цагаач иргэн ба Кханы армийн офицер хүү Иракт алагдсан. Кхан, 2016 оны Ардчилсан намын үндэсний их хурал дээр үг хэлснийхээ дараа үндэсний хэмжээнд нэр хүндтэй болж, Дональд Трампын уур хилэнгийн бай болж байсан юм.

Дайан Нэш:
Оюутны Хүчирхийлэлгүй Зохицуулах Хорооны үүсгэн байгуулагч гишүүн, Нэш 20-р зууны иргэний эрхийн хамгийн чухал компанит ажлуудыг зохион байгуулж, Кингтэй хамтран ажилласан.

Меган Рапиное:
Олимпийн алтан медальт, эмэгтэйчүүдийн хөлбөмбөгийн дэлхийн аварга шалгаруулах тэмцээний хошой аварга, Үндэсний эмэгтэйчүүдийн хөлбөмбөгийн лигийн OL Reign-ийн ахлагч юм. Тэрээр Жендэрийн цалингийн тэгш байдал, арьс өнгөөр ​​ялгаварлан гадуурхахын эсрэг шударга ёс, LGBTQI+ эрхийн төлөөх нэр хүндтэй өмгөөлөн дэмжигчээр Байдены Цагаан ордонд гарч ирсэн юм.

Алан Симпсон:
АНУ-ын Вайоминг мужаас тэтгэвэртээ гарсан сенатор, Байдентай хамт ажиллаж байсан бөгөөд сонгуулийн компанит ажлын санхүүжилтийн шинэчлэл, хариуцлагатай засаглал, гэрлэлтийн тэгш байдлыг хангахын төлөө тэмцэгч байсан.

Ричард Трумка:
Трумка 2021 оны наймдугаар сард нас барах үедээ 12.5 сая гишүүнтэй AFL-CIO-ийн ерөнхийлөгчөөр арав гаруй жил ажилласан. Тэрээр өмнө нь Уурхайн ажилчдын нэгдсэн нийгэмлэгийн ерөнхийлөгчөөр ажиллаж байсан.

Вилма Воють:
Бригадын генерал Воють бол АНУ-ын цэргийн түүхэн дэх хамгийн өндөр цол хүртсэн эмэгтэйчүүдийн нэг бөгөөд албан тушаал ахихдаа хүйсийн, жендерийн саадыг эвдсэн нэгэн ба Воють 1985 онд тэтгэвэртээ гарахдаа Зэвсэгт хүчний долоон эмэгтэй генералын нэг байв.

Рауль Йзагурре:
Иргэний эрхийн төлөө тэмцэгч, Йзагурре 30 жилийн турш Ла Разагийн Үндэсний зөвлөлийн ерөнхийлөгч бөгөөд гүйцэтгэх захирлаар ажилласан. Тэрээр Обамагийн үед Бүгд Найрамдах Доминикан улсад АНУ-ын Элчин сайдаар ажиллаж байсан.

Ерөнхийлөгчийн эрх чөлөөний медаль гэж юу вэ?
Байденаас медаль хүртэх гавъяатнууд нь "урлаг, шинжлэх ухааны салбарт гайхалтай амжилтанд хүрэхийн тулд томоохон саад бэрхшээлийг даван туулж, бидний дунд хамгийн эмзэг бүлгийнхнийг хамгаалахын төлөө амьдралаа зориулж, нийгэмд өөрчлөлт оруулахын тулд зоригтойгоор ажилласан, хойч үеийнхэнд зам мөрөө үлдээгч юм" гэж Цагаан ордон мэдэгдэв.
Энэхүү өргөмжлөлийг АНУ-ын хөгжил цэцэглэлт, үнэт зүйл, аюулгүй байдал, дэлхийн энх тайвныг тогтоох, нийгмийн болон хувийн бусад чухал хүчин чармайлтад үлгэр жишээ оруулсан хүмүүст зориулагдана гэж мөн Цагаан ордон мэдэгдэв.

Эх сурвалж: usatoday.com