Трампын засаг захиргаа наймдугаар сарын 27-нд, гадаад оюутнуудын АНУ-д суралцах хугацааг дөрвөн жилээр хязгаарлах шинэ дүрэм санаачилсан тухай CNN мэдээллээ.

Энэхүү дүрэм нь гадаад оюутнууд, соёлын солилцооны оролцогчид, гадаадын хэвлэл мэдээллийн төлөөлөгчдийн визэнд хамаарна. Цагаан ордон сүүлийн үед, оюутны визэнд хатуу шалгуур тавьж, зарим улсын оюутнуудад, ялангуяа хууль зөрчсөн оюутнуудын эсрэг хатуу арга хэмжээ авсаар байгаа юм.

Одоогоор F- оюутны визтэй гадаад оюутнууд суралцах хугацаанаас үл хамааран АНУ-д байх боломжтой бөгөөд харин энэ шинэ дүрмээр. гадаад оюутнууд болон солилцооны суралцагчдын оршин суух хугацааг "хөтөлбөрт хамрагдах хугацаанд нь, гэхдээ дөрвөн жилээс хэтрэхгүй" гэсэн тодорхой хугацаагаар өөрчлөх юм. Санал болгож буй дүрэмд, суралцаж төгссөн оюутнууд "эрх зүйн статусаа хадгалах ба АНУ-ыг орхин явахад шаардлагатай арга хэмжээгээ зохион байгуулах" АНУ-д хууль ёсоор оршин суух эрх 60 хоногийн хугацаатай байна.

Мөн дүрмээр гадаадын сэтгүүлчдийн байх хугацааг тогтоосон. Одоогийн байдлаар энэ нь хөтөлбөр эсвэл ажил эрхлэлтийн хугацаатай тэнцүү (хамгийн ихдээ 240 хоног), сунгах хугацаа ч адил байна.

"Өмнөх засаг захиргаа, гадаад оюутнууд болон бусад виз эзэмшигчдийг АНУ-д бараг хязгааргүй хугацаагаар оршин суухыг зөвшөөрч, аюулгүй байдлын эрсдэлийг бий болгож, татвар төлөгчдийн мөнгийг дэмий үрж, АНУ-ын иргэдийг таагүй байдалд оруулж байсан. Шинэ дүрэм нь, зарим виз эзэмшигчдийн АНУ-д байх хугацааг хязгаарласнаар, дурдагдсан эрсдэлүүдийг зогсоож, холбооны засгийн газар, гадаад оюутнууд, тэдний түүхийг зохих ёсоор хянахад хялбар болгоно " гэж Дотоодын аюулгүй байдлын яамны (DHS) хэвлэлийн төлөөлөгч мэдэгдэв.

Төрийн департамент мөн сүүлийн саруудад оюутны визний шалгалтын бодлого, журмыг чангатгасан. Энэ он гарсаар 6000 гаруй оюутны визийг, визний хугацаа хэтрүүлсэн эсвэл хууль зөрчсөн гэх шалтгаанаар цуцалсан. Эдгээр зөрчлийн "дийлэнх нь" нь, танхайрах, согтуугаар тээврийн хэрэгсэл жолоодох, хулгай хийх, "терроризмыг дэмжих" зэрэг гэмт хэрэгтэй холбоотой. Цуцлагдсан визний тоо өнгөрсөн оны мөн үеийнхээс бараг дөрөв дахин их байна гэж Төрийн департаментын албан тушаалтан өнгөрсөн долоо хоногт мэдэгдсэн юм.

Тус хэлтэс нь 6-р сард Элчин сайдын яам, консулын газруудад, оюутны виз хүсэгчдийг "манай улсын иргэд болон соёл урлаг, засгийн газар, төрийн байгуулалтын зарчимтай дайсагналцаж байгаа" эсэхийг сайтар шалгах ёстой гэсэн үүрэг өгсөн байна.