Агаарын тээврийн United Airlines компани, эконом ангилалдаа хэвтэж амрах суудал нэвтрүүлнэ

Одоо эконом классаар аялахдаа, тухтайхан амарч,нойр авах боломжтой болох гэж байна. United Airlines, холын нислэгийн хамгийн том асуудлуудын нэг болох, зорчигчид хангалттай амарч чаддаггүй байдлыг шийдэхээр оролдож байна гэж Pax News мэдээлжээ.

Энэ долоо хоногт Лос-Анджелес хотод болсон хэвлэлийн арга хэмжээн дээр, компани United Relax Row нэртэй шинэ суудлын концепцийг танилцуулсан байна. Энэ нь зорчигчид эконом классын гурван суудлын хэмжээнд, суудлаа диван шиг болгон сунгаж, унтах, амрах эсвэл илүү хувийн орон зай бий болгох боломж олгоно.

Business Traveller-ийн мэдээлснээр уг шинэчлэлийг 2027 онд нэвтрүүлэхээр төлөвлөж байгаа бөгөөд арван жилийн эцэс гэхэд, Boeing 787 болон Boeing 777 загварын 200 гаруй онгоцонд суурилуулах аж. Энэ нь туршилтын бус, томоохон төсөл юм байна.

Энэхүү шинэ суудал нь, илүү тав тух хүсдэг ч бизнес ангиллын үнэтэй тасалбар авахыг хүсдэггүй зорчигчдод зориулагджээ. Үнэндээ энэ санаа огт шинэ зүйл биш бөгөөд Air New Zealand өмнө нь “Skycouch” нэртэй, төстэй шийдлийг нэвтрүүлж байсан.

Гэхдээ United-ийн хувьд ялгаа нь хэмжээ, хамрах хүрээ юм. Хойд Америкийн аль ч агаарын тээврийн компани өмнө нь, ийм системийг өргөн их биетэй онгоцонд нэвтрүүлж байгаагүй бөгөөд тус компани бүс нутагтаа энэ загварыг ашиглах онцгой эрх авсан байна.

Relax Row нь, Premium Plus хэсгийн ард байрлах бөгөөд эдийн засгийн ангилал доторх “дунд шатны” илүү тав тухтай сонголт болно. Нэг онгоцонд дунджаар 9 орчим, дээд тал нь 12 ийм хэсэг байхаар төлөвлөжээ. Суудлууд нь хөл тавих хэсэгтэй бөгөөд суудлын түвшинд хүртэл дээш өргөгдөнө.

Ингэснээр гурван суудал нийлж нэгэн жигд гадаргуу үүсгэж, зорчигч хэвтэж амрах боломжтой болох юм.

Мөн зорчигчдод дараах нэмэлт хэрэгслүүдийг санал болгоно:

• Матрас дэвсгэр
• Том хөнжил
• Нэмэлт дэр

Хүүхэдтэй гэр бүлүүдэд зөөлөн тоглоом болон тоглох багц өгч, нислэгийг илүү тайван, тав тухтай болгох аж.

Ерөнхий стратегийг харахад, Polaris нь холын нислэгийн дээд зэрэглэлийн бүтээгдэхүүн хэвээр үлдэнэ. Харин Relax Row нь, премиум ангиллаас хямд үнээр илүү зай, тав тух санал болгох дунд шатны хувилбар болж байна.

Сул суудал байгаа тохиолдолд нэг зорчигч бүхэл бүтэн Relax Row хэсгийг захиалж, бараг бизнес ангилалтай дүйцэхүйц тав тухтай орон зайд нисэх боломжтой гэж компани мэдээлжээ.

Ялангуяа бага насны хүүхэдтэй гэр бүлүүдэд энэ нь, маш аятайхан практик шийдэл бөгөөд унтах, хөдөлгөөн хийх тусдаа орон зайтай болсноор урт нислэгийн стрессийг мэдэгдэхүйц бууруулна.

Үнийн талаар одоогоор мэдээлээгүй байгаа ч энэхүү үйлчилгээ амжилт олох эсэх нь үнэ тарифын бодлогоос ихээхэн хамаарах төлөвтэй байна.