2026 оны Атлантын далайн хар салхины улирлын анхны таамгууд нийтлэгдлээ. Цаг уурчид, хэд хэдэн хүчтэй шуурганд АНУ-ын нутаг дэвсгэр өртөж болзошгүйг анхааруулж байна гэж Daily Mail бичжээ.

Цаг уурын AccuWeather компанийн мэргэжилтнүүдийн мэдээлснээр, 2026 онд 11–16 нэртэй шуурга үүсэх төлөвтэй байгаа бөгөөд тэдгээрээс тав хүртэлх шуурга, АНУ-ын зүүн эрэг болон Мексикийн булангийн эргийн мужуудад шууд нөлөөлж болзошгүй байна.

AccuWeather-ийн хар салхины тэргүүлэх шинжээч Алекс ДаСилва,

“Өмнөд Техасаас эхлээд Мэн муж хүртэлх бүс нутгийн бүх хүн, хар салхины улиралуудад бэлтгэлтэй байх нь маш чухал” гэж онцолжээ.

Хар салхины улирал 6-р сарын 1-нд эхлэх бөгөөд нийтдээ 4–7 хар салхи үүсэх төлөвтэй байна. Энэ нь сүүлийн 30 жилийн дундажтай ойролцоо эсвэл бага зэрэг доогуур үзүүлэлт юм. Хэдийгээр улирал нийт дүнгээрээ дундаж эсвэл дунджаас бага түвшинд байх төлөвтэй ч, АНУ-д хар салхи шууд нөлөөлөх эрсдэл өндөр хэвээр байгааг цаг уурчид анхааруулж байна.

AccuWeather-ийн баг ялангуяа Виржини, Хойд ба Өмнөд Каролина, Флорида, Алабама, Миссисипи, Луизиана мужийн оршин суугчдыг урьдчилан бэлтгэлээ хангахыг уриалсан бөгөөд учир нь, цөөн тооны хар салхи ч олон хүний амь нас хохироож, тэрбум тэрбум долларын хохирол учруулж болзошгүй гэж үзэж буйгаа илэрхийлжээ. Тэрээр, “Анхаарал болгоомжоо сулруулах хэрэггүй. Ганцхан шуурга ч асар их хохирол учруулж, хүмүүсийн амьдралыг орвонгоор нь өөрчилж чадна. Даатгал, аюулгүй байдлын төлөвлөгөө, нүүлгэн шилжүүлэх маршрутаа яг одоо шалгаарай. Мөн онцгой байдлын үед хэрэгтэй зүйлсийн нөөцөө бүрдүүлсэн байх ёстой” гэжээ.

Мөн National Oceanic and Atmospheric Administration (NOAA)-ийн төлөөлөгчид, эрсдэл өндөр бүсийн иргэдийг шатахуун, хүнс, ус зэрэг нөөцөө урьдчилан базаахыг зөвлөсөн байна.

6-р сараас 11-р сарын сүүл хүртэл Атлантын далайд 180 км/цаг-аас дээш салхитай, 3 болон түүнээс дээш зэрэглэлийн 2–4 хүчтэй хар салхи үүсэх магадлалтай. Эдгээр нь ноцтой эдийн засгийн хохирол учруулах чадвартай.

Энэ жилийн таамаг, өнгөрсөн жилийн улирлынхыг ихээхэн давтах магадлалтай байна. 2025 онд Атлантын далайд 14 нэртэй шуурга үүсэж, тэдгээрээс дөрөв нь томоохон хар салхи болсон бөгөөд дөрөв нь АНУ-д хүрсэн. Харин 2025 онд ямар ч хар салхи эх газарт гарч ирээгүй юм.

AccuWeather мөн 6–7-р сард АНУ-ын ойролцоо үүсдэг “орон нутгийн” шуурганы эрсдэл нэмэгдэнэ гэж анхааруулжээ. Эдгээр шуурга нь ихэвчлэн Мексикийн булан, Карибын тэнгисийн баруун хэсэг эсвэл АНУ-ын зүүн эргийн ойролцоо үүсдэг. Ийм төрлийн шуургууд халуун далайн усны нөлөөгөөр маш хурдан хүчтэй болж, тропикийн депресс, тропикийн шуурга, бүр хар салхи хүртэл хөгжиж чаддаг. (Тропикийн депресс нь хар салхины хамгийн эхний шат юм.)

Ийм шуурга эрэгт маш ойрхон үүсдэг тул АНУ-ын зүүн өмнөд бүсийн сая сая хүнд бэлтгэл хангах эсвэл нүүлгэн шилжихэд 2 хоногоос бага хугацаа үлдээдэг. Харин Атлантын далайн алс хэсэг эсвэл Африкийн эргээс үүссэн шуургууд АНУ-д хүрэхдээ ихэвчлэн 1–2 долоо хоног зарцуулдаг. Мөн ийм шуурга нэмэгдэх боломжийн нэг шалтгаан нь, Атлантын далайн зүүн эрэг (Каролинагаас Флорида хүртэл), Мексикийн булан, Карибын тэнгисийн ус маш халуун байдагтай холбоотой байдаг бөгөөд Тропикийн циклонууд далайн халуун усыг “шатахуун” болгон ашиглаж, хэдхэн цагийн дотор энгийн аадар борооны системээс 120 км/цаг-аас дээш салхитай хар салхи болж чаддаг байна.

Харин шуурганы улирлын идэвхийг бууруулж болзошгүй нэг хүчин зүйл нь, Номхон далайд үүсэх Эль-Ниньо үзэгдэл юм. Энэ нь Атлантын бүсэд салхины зөрүүг нэмэгдүүлж, үүсэж буй хар салхийг “тасалж”, хүчжихээс нь сэргийлдэг.

2025 онд NOAA, 19 хүртэл нэртэй шуурга үүснэ гэж таамаглаж байсан ч бодит байдал дээр ердөө тав нь хар салхины түвшинд хүрсэн (Эрин, Габриэль, Умберто, Имельда, Мелисса). Эдгээрээс гурав нь 250 км/цаг-аас дээш салхитай хамгийн хүчтэй тавдугаар зэрэглэлд хүрчээ.

2025 оны хар салхины улирлын үеэр Атлантын бүсэд нийт 125 хүн амь насаа алдсан бөгөөд ихэнх нь Карибын бүсэд Мелисса хар салхи-ийн үеэр амиа алджээ.

АНУ-д дөрвөн шуурганы шууд нөлөөллөөс үүдсэн хохирол 500 сая ам.доллараас давсан бөгөөд хамгийн их хохирол Хойд Каролинад Шанталь шуурганы улмаас бүртгэгдсэн байна.

Хэдийгээр 2026 онд АНУ-д шууд нөлөөлөх шуурганы тоо бага байх төлөвтэй ч, AccuWeather, хар салхины нөлөөллийн эрсдэл өндөр хэвээр байна гэж үнэлжээ.